Albisteak

2021 Urtarrila 11

Euskararen Ginkanan izena emateko epea zabaldu da

Osatu 4-6 laguneko taldea eta parte hartu 7. Edizioko Euskararen Ginkanan.
Sariak eta dibertsioa ziurrak!

Kutxa Ekoguneak euskaraz eta euskararekin dibertitzeko antolatzen duen taldekako lehiaketa da Euskararen Ginkana. 7.edizio honetan ere, Euskaltzaleen Topaguneak eginen ditu koordinazio lanak.

Helburua herritarren artean hizkuntzekiko sentiberatasuna eta euskararen erabilpena sustatzea da, hizkuntzen zein aniztasunaren jasangarritasuna eta hizkuntza-ekologiaren kontzeptuak ezagutzera emanez. Horretarako, urtero gai zehatz bat aukeratzen da eta burutu beharreko probak gai horri buruzkoak izaten dira.
 

Nortzuk parte hartu dezakete?

Lagun koadrilak, Mintza taldeak, guraso eta ikasle taldeak, Mintzakoadrillak, jai batzordeak, aisialdi taldeak, euskaltegiko lagunak, tokiko enpresak, kirol taldeak, talde feministak, ekologistak… ondo pasatzeko gogoz zaudeten 4-6 lagun elkartu eta osotu taldea! (16 urtetik gorakoak izan behar dute)
 

4 aste, 4 proba, 4 sari

  • Lau aste iraungo du Euskararen Ginkanak: otsailaren 3an hasi eta martxoaren 3ra arte. Martxoaren 20an final handia jokatuko da, Kutxa Ekogunean (Donostia) bi aurkezle oso berezirekin: Ilaski Serrano eta Kike Amunarriz, Mihiluze lehiaketako aurkezleak elkartuko dira.
  • Lau proba online: otsailean, beraz, astero proba bat burutuko dute partehartzaileek. Online ikusiko dute zer egin behar den, www.euskararenginkana.eus webgunean, eta online bidaliko dute proba eginda.
  • Lau sari: puntu gehien dituzten lau taldeak martxoak 20ko final handira pasako dira. Talde finalista denek eramango dute sari bana. Sari potoloena 3.000€koa da, euskararen alde egin nahi duten asmo hori burutzeko (mendi irteera bat euskaltegiko lagunekin, euskararen egun bat antolatu herrian, Errigorako saski pila bat erosi eta eskolan banatu, futbito txapelketa bat koadrilen artean…zenbat gauza egin daitezkeen!).
     

Izen emateak urtarrilaren 11tik 31ra

Lehendabizi, 16 urtetik gora dituzten 4-6 laguneko taldea osotu, www.euskararenginkana.eus webgunean sartu eta bertoko galdetegia bete behar da. Horrez gain, talde bakoitzak bideo labur bat grabatu behar du, bi minuturen bueltakoa, taldearen eta sariarekin babestu nahi den proiektuaren aurkezpen txiki bat eginez.

Talde irabazleak 3.000€ jasoko ditu eta sariaren %90 gutxienez, izena ematerakoan aurkeztutako euskararen aldeko egitasmoa finantzatzeko erabiliko du. Talde finalista guztiek, gainera, sari bana jasoko dute finalean parte hartu izana saritzeko.


www.euskararenginkana.eus